Ja, om du ikkje har fått det med deg, så har det vore litt stille på Kvitter i det siste. Eg har likevel skjønt at folk framleis er innom og les og sånt, og det er jo kjekt. Og eg har også fått fleire førespurnader om å sende Yoshi-barna ut på nye eventyr igjen. Kanskje det, kanskje. 

Iallfall, her er noko av det som har skjedd sia sist!

- Eg fekk ikkje plass på klarspråkemnet eg hadde tenkt å ta på Blindern dette semesteret. Kjipern.
- Eg er blitt frilanskorrekturlesar for Samlaget og sit no og les korrektur på ei bok for dei. Det er kjempespennande!
- Eg har fylt 21 år.
- Broren min har også fylt 21 år.
- Eg har vore på vinterleir med Norsk Målungdom på Røros. Stas!

Sidemål meg her og sidemål meg der

Eg må innrømme å ha stukke hovudet litt i jorda eller sett ein annan veg ved kvar einaste sidemålsdiskusjon den siste tida. Det har vore vanskeleg, men eg har greidd det heilt greitt. Men for dei av dokker som lurer på kor eg står i "sidemålsKRIGEN", kan eg jo setta opp nokre punkt om kva eg meiner og kor eg står:

• Eg trur at nynorsk verken er, har vore eller nokon gong kjem til å bli avhengig av den obligatoriske sidemålsopplæringa for å overleva.
• Eg trur ikkje nynorsken eksisterer på grunn av sidemålsordninga, men på trass av ? lite skadar nynorsken meir enn at mange elevar føler at skriftspråket er trædd nedover hovudet på dei.
• Eg meiner ikkje det er allmennkunnskap å kunna uttrykke seg på både nynorsk og bokmål.
• Eg synest målsettinga om at alle norske elevar skal vera like flinke i nynorsk og bokmål, er fullstendig urealistisk.
• Det nye forslaget om å ikkje lenger ha like høge krav til skriveferdigheiter i sidemål som i hovumål, er eit veldig godt forslag. Slik var ordninga da ho blei innført, slik var ordninga lenge, og eg trur det er best å ha ordninga slik.
• Ingen forsøk med valfritt sidemål har vist at elevar blir flinkare i hovudmål av å droppe sidemål. Derimot har alle forsøka vist at mange er interesserte i å få opplæring i sidemål. Det nye forslaget manglar derfor noko heilt grunnleggande: eit tilbod til dei som vil lære begge delar!
• Det er skadeleg for nynorsken at så mange berre forbind skriftspråket med eit skolefag.

Så ja. Der har du meg. Eg synest det nye forslaget var veldig bra, med unntak av at det går frå ei målsetting om at alle skal skrive bokmål og nynorsk like godt (ein håplaus og urealistisk idé), til at ingen skal gjera det. Om Norge har tenkt til å fortsetta å vera tospråkleg, er vi avhengige av at nokon, men ikkje alle, kan meister begge språka.

Framover?

Eg veit ikkje, eigentleg. Eg har veldig lyst til å laga nye eventyr med Yoshi-barna, men den siste tida har eg jobba ein del, vore sjuk, vore på leir, spelt konsert osv. Denne veka er det både årsmøte i SmiO og landsstyremøte i NMU, men etter det ser kalenderen behageleg tom ut, og slik har eg lyst til å ha det ei stund.

Eg lærer forresten stadig meir om nynorsk rettskriving. Er det nokon som vil eg skal skrive eit innlegg eller to om noko spesielt dei synest er vanskeleg? Berre sei frå, det får eg lett til.

Latsabb.

Eg laga alt med iPhone-en. Og no merkar eg kor lett det er å vingle mellom "vi" og "me" (dei små skal jo seia "me", eigentleg). Eg treng ein korrekturlesar.

Som vanleg inneheld boka satire av både Odda og Oslo, men nytt av året er litt svenskehumor også. Det er berre godt! Boka er mindre pervers enn vanleg, så mora mi sat heldigvis ikkje kaffien i halsen da eg gav ho boka til bursdagen hennar. Menmen.

Sjølvsagt må eg kommentere måten Frode Grytten skriv nynorsk på, men aller først det obligatoriske bildet av meg med boka framfor fjeset:

Skal ein plassere nynorsken til Grytten ein plass, må det bli mellom Ragnar Hovland og Are Kalvø, der Hovland skriv følgjerett, umarkert nynorsk heilt etter boka, mens Kalvø skriv dialektal og sterkt bokmålsprega nynorsk. Grytten hamnar ein plass i midten.

Men med unntak av litt absurdt ast-passiv-bruk på dei første sidene, står ikkje språket i vegen for lesinga, så dette er absolutt godkjent! Mange av formene han bruker, skal ut av rettskrivinga neste år (f.eks. glømme, fikk og herlig), så kanskje han berre bruker formene mens han kan (men eg tviler jo på at Grytten kjem til å rette seg etter den nye rettskrivinga).

Men er du ute etter ei god bok å gi nokon i julegåve, kanskje for å sniknynorskifisere bokhylla til ein venn eller slektning, så er Saganatt eit godt val. Sjølv ønskjer eg meg Stille natt av Ragnar Hovland til jul i år, så den kjem det ikkje noko kvitter om før i romjula. Men eg fekk med meg at bokmeldaren i Dag og Tid meinte det var den beste Hovland-boka. Så eg gler meg til den også.

Kremtoppar og Mokkabønner må alltid stå hulter til bulter, og det gjer dei enno! Artig med det.

No sit eg på kontoret aleine og les gjennom denne vekas avis. Dette er ein jobb eg trivst veldig godt med, om nokon lurte. Eg får sitta fleire timar i veka og drive med nynorsk. Kva meir kan ein gut spørja om?

Det blei visst ein lang periode utan at eg gav lyd frå meg, men i kommentarfelta har det ikkje vore stilt! Eg har vore innom og lese og godkjent ein masse kommentarar på både gamle og nye innlegg. Om du ikkje fekk med deg alt, drar eg her fram eit lite oversyn:

I innlegget om Yoshi-barn på IFA-messa skreiv eg at kjærasten (som no er blitt eks-en) min kom med ein slengmerknad om at ingen les bloggen min. 13 av dykk følte for å kommentere at han tok feil, og det gjekk om lag slik (mange skreiv meir enn akkurat dette, men det kutta eg vekk for å gjera lista fin, høhø):

Frå Austfold/Østfold..?: Eg les det!
Marita: Eg les og!
kallenamnslaus: Klart vi les :)
anders: jeg leser også, altså
Eirin: æ læs!
skamlaus: Læs òg.
anonym: altså. jeg leser jo. fortell det til kjæresten din, du.
Marta: Eg les òg!
Kong Slafen: Kult... Gi meg en sånn Yoshi.. Og jo jeg leser bloggen nå.. så F your b friend :P 
catta: Eg lesar!
Kine: Eg les! Og eg syntest det var moro òg!  Dette er ein kjempefin blogg! :)
Malene: Er da flere som leser bloggen din! Du legger jo ut så mange fine Yoshibilder (: 

Dette var jo veldig hyggeleg å høyre! Spesielt sidan det var nokre nye namn på den lista. Eg trudde jo eg meir eller mindre kjente til alle som var innom og kommenterte på jamn basis.

Og anna nytt

Den til no mystiske nynorskdama på Libris, som eg ved éi anledning fann ut at heitte Gunvor Edel, har no gitt lyd frå seg på eit innlegg om Nynorsk-Libris! For dei som ikkje gidd å klikke seg vidare til innlegget for å lesa kommentaren, limer eg like greitt inn alt her:

Hohoi, dette var gama! Eg er dama som skriv desse skilta, og ei eg jobber med hadde funne denne sida, så må berre inn og kommentere. Elsker at folk legg merke til nynorsken! At det er nokre skrivefeil må eg berre beklage, men takk til Vegard som "forsvarer" meg...eg jobber i bokhandel ja, og elsker litteratur, men språk er ikkje mitt sterkaste fag. Slær opp alt eg VEIT eg ikkje kan, men elles gjeng det dessverre noko kjapt (tidsklemma!) og då vert noko på dialekt/kva eg bruker seie osv. Spillmagasin er dog eit spel, så eg kan ikkje kalle det noko anna. Men imorgo den dag skal eg kike på alle lappane og sjå kva eg må rette!

Vil elles takk mine supre sjefar som let meg skrive på nynorsk, sjølv om det berre skulle mangle eigentleg då..Ok, eg er på jobb no, så kan ikkje svare/sjekke ut denne bloggen meir no, men som sagt, gama at det vert teke mot med slik glee(og noko sinne, heh)!!

Og kva anna kan ein vel gjera enn å feire:

Og heilt til slutt ein liten merknad til Marta som lurte på korfor eg lét Android-monstera seia "Tak oss åt leidaren din!" og ikkje "Tak oss åt leiaren din!". Marta har heilt rett i at det etter ordlista skal heite leiaren, men eg valde å bruke ei eldre form når eg først skulle skrive "tak" og "åt". Mange møringar seier og skriv leidar, breidare og så vidare - eg synest det er gromme greier!

Google "drunk(en) octopus", så skjønner du kva det går ut på. Denne fann eg på ein gutedo på Blindern. Ikkje eg som har fare med tusj, altså.

Ellles har eg lese nokre gode bøker i det siste! "Når ein fyrst skal skyte nokon" av Arnfinn Kolerud, "Ivar Nimme" av Arne Hjeltnes, "Saganatt" av Frode Grytten, "Prøvetid" av Edvard Hoem. Sjekk ut! No for tida er eg spent på den nye til Ragnar Hovland.

Koss gjeng det med deg?

Hepp! Denne gongen har Yoshi-barna vore på IFA-messa i Berlin! Der var det mykje kult, og mange fine fargar!

Lillegrønn på ei kokeplate.

Lillegrønn på ei vaskemaskin.

Lillegrønn på eit kjøleskap.

Lillegrønn på ei oppvaskmaskin.

Eg spelte eit "vask tøyet"-spel, kor ein skulle trykke på skitflekkene så fort som mogleg. Eg tangerte rekorden, men andre gongen eg prøvde, fekk eg berre 190. :C

Angry Birds var verkeleg i vinden! Her er det Nokia som har laga ei Angry Birds-utstilling kor ein blant anna kunne spele *trommekvervel* Angry Birds...

Web-kamera med autofokus. Snedig. 

Gear4 hadde den aller stiligaste Angry Birds-utstillinga. Desse store figurane er høgtalarar!

Kinesiske Haier hadde denne mannen til promotør. Det var ein levande mann som oppførte seg som ein robot og plaga dei som gjekk forbi.

Lillegrønn fekk ein penn.

Lillerosa fann Tivoli-radioar i fine fargar.

Og så fann alle tre ein radio i kvar sin nyanse.

Dette er eit høgtalarsett.

"Tak oss åt leidaren din!"

Slapp av, han berre kiler...

Lillesvarten fann seg ein ny ven.

Hugsar du testen eg skreiv av promo-snopet på Elektrofil-messa? Vel, du kan gjette kva som kjem frå IFA...

I Berlin står det ei rekke "Buddy Bears", som er ei slags verdsutstilling med bjørnefigurar. Dei fleste land har laga ein slik bjørn, inkludert Norge. Etter å ha leita lenge, fann eg den norske bjørnen, som såg slik ut (den i midten):

I Berlin har dei Starbucks:

På hotellet har vi takterrasse:

Eg fekk ikkje nettet på hotellet til å funke i går, så bilda kom i dag. Seinare kjem eit innlegg med bilde frå IFA-messa, som er heile grunnen til at eg er her (kjærasten er journalist og skal skrive om messa). Der var det mange fine stader å ta bilde av Yoshi-barna!

Bilda er tatt med forskjellige kamera.

Og det var den daglege dosa nynorsk frå hjartet av Oslo. Det er alltid koseleg med nynorsk i Oslo, synest eg. Eg tar bilde av det eg ser.

I morgon kjem eit innlegg med Yoshi-barn i Berlin! ... igjen? Kva gjer dei denne gongen?

No har eg jobba ei lita stund med å redigere tekst og lesa korrektur på deltid i ei ikkje ukjent nynorskavis. Det er ein jobb eg trivst godt med, og når eg no skal posere med ei bok framfor ansiktet, er valet lett:

Finn-Erik Vinje er ein konservativ riksmålselitist, men han er flink med skrivereglar!

Vil du merke noko nytt på Kvitter no som eg er korrekturlesar? Jau, for første gong i livet har eg endeleg lært meg kommareglane. Ser du kommafeil i eit innlegg, er du velkommen til å seia frå! Det gjeld sjølvsagt òg for grammatiske feil, men hugs at eg - som alle andre - kan trykke feil iblant. Eg les aldri korrektur på blogginnlegga mine heller.

I avisa har vi inga husnorm, det betyr at alle journalistar og skribentar vel språkstil sjølv. For journalistane som skriv nynorsk, skal eg ikkje velja former for dei, men sjå til at dei er konsekvente i vala sine og at språket er fint og flyt godt. "Vil du skrive tåla med o eller å?" - "Kva er mest konservativt?" - "Med o." - "Då tek vi det med o."

Problem?

Ein støter på nokre problem når ein les korrektur på nynorsk, eit av dei er valet mellom ø- og y-former. For om nokon skriv fyrst, bør dei òg skrive fylgje - det vil eg tru dei fleste er einige i. Men følgjer former som syrgje, sylv og nykel med i same rekka? Det trur eg ikkje.

Etter læreboknormalen er ikkje dette valet noko anten - eller. Tilsette i offentleg administrasjon må skrive syster og bytte, tørst og sørgje, men kan velja mellom fyrst og først. Journalistar treng ikkje halde seg til hovudformene, men det kan vera vanskeleg å bestemme kva av desse formene som går hand i hand.

Heldigvis er "problemorda" veldig lite frekvente. Ofte får eg inntrykk av at skribenten ikkje veit at det finst ei alternativ y-form han/ho kan bruke. Nesten ingen vel å skrive nyste (garnnøste), hyrne (hjørne), stytte (gravstøtte), glytt (døra på gløtt), eller grysja (å grøsse). Eg vel å tenke at det går heilt fint an å velja vokal i desse orda uavhengig av om ein skriv med y- eller ø-former elles.

Har du spørsmål til korrekturlesar-Vegard, er det berre å fyre laus.

Forresten så har eg vore på landsstyremøte i Norsk Målungdom. Vi prata litt om bloggar på nynorsk.no-domenet, og eg har tenkt at eg skal laga ein kløyvd-blogg. Meir om det kjem seinare!

Kva betyr teiknet til venstre? Søstera mi og eg prøvde å forstå kva det var, og vi gjetta rett. Ser du kvamannenden kjønnsnøytrale strekmannen gjer?

Utafor garden til onkelen min, som fylte 70 år, såg eg denne lappen på ein postkasse. Ved sida av postkassene sine har dei ei raud postkasse til utgåande post, for at dei skal slippe å dra til nærmaste postkontor (som er veldig, veldig langt unna - jamfør dei neste bilda). Der fann eg denne språkperla:



For å koma seg til garden der onkelen min no bur, og der mor mi vaks opp, må ein køyre langt ut mot kysten. Langs den snirklate vegen ligg det andre gardar, og det blir lengre mellom gardane jo lengre ein kjem frå dei meir urbane strøka. Det ser om lag slik ut.



Verken asfalten eller mobildekninga går heilt ut til der onkelen min held hus. Her ute blir det meir stille enn eg har opplevd nokon annan stad, og det er utruleg deilig.



Så ei anna språkperle frå ei gammal utgåve av ei lokalavis (eg gløymde å skrive ned namnet!) eg fann i dei gamle sakene til besteforeldra mine. Det var mykje nynorsk i Nord-Trøndelag før, men no er han nesten forsvunnen derifrå. Men då mor mi vaks opp, las alle søskena Norsk Barneblad. Eg fann òg gamle utgåver av Dag og Tid i eskene. Kjekt.



For dei som vil lese heile artikkelen, har eg lasta opp eit større bilde på Twitter, kor eg forresten har bytt namn til Vegardbeid. Det finst framleis folk som ikkje forstår ordspelet.























Like ved sida av, hang ein ikkje fullt så sjarmerande lapp på byråkrat-bokmål:

Eg følte plutseleg at eg stod i ein etat og skulle søke om løyve til å drikke kaffi. Kva med å skrive noko hyggeleg, som "Det er berre plass til to barnevogner i kafeen, men vi har meir plass i første!"?

Til slutt har eg eit bilde av eit klistremerke eg såg på Majorstua t-banestasjon her om kvelden. Lurer på kven som klistrar opp slike. Eg liker det.